À VENDA NOS SEGUINTES LOCAIS

À VENDA NOS SEGUINTES LOCAIS
PONTOS DE VENDA: União dos Escritores Angolanos; Rede de Supermercados KERO; Tabacaria GRILO (edifício do Mercado de Benguela); Livraria SUCAM, Benguela; Livrarias LELLO, MENSAGEM e na SALA DE EMBARQUE do AEROPORTO INTERNACIONAL 4 DE FEVEREIRO, Luanda

sexta-feira, 14 de agosto de 2009

Amalehe vakuela volupale puãi vasumbila ovituwa kuenda oviholo. Caposoka cimue!

Oviholo vietu catiamela kolohuela volupale vitongeka, ndaño l'akatanga kwenda ovituwa ale ekalo liaco lielitokeko lovituwa violonungi ale vina vitundilila kolofeka viokosamua. Nda tulavulula oviluvialuvia evi ndeti, viakatulua osayi yapita vo Lobito, tulete okuti emela li'uti wondende lieli, cisokoluisa ocindumba.
Eyi yokombuelo, ombundi yolondombua. Kacitava okuti oviholo vietu viutundasonde vinyoleha locimongua. Tu tongeki!
Sali po ciwa!
Gociante Patissa

sexta-feira, 3 de julho de 2009

Twatambula onima omo liocinyi... tuapandula

Eci tualitumbika ocikele co kuyevalisa asapulo, ovilongua kuenda ovisimilo velimi li'Umbundu, tuakulihile ale okuti ocikele cimue kacalelukile. Otembo yalinga itito, ale pamue kavialuile ovitumalo viasapulo kUmbundu. Olonjanja vialua tusiata okuyeva esakalalo omo tukuete ohuminyo lava vasiata okutunyula.

Puãi ndaño lasakalalo, utõi wetu watambula ombanjaile yatundilila kevindi liukuetu Cangue (www.cangue.blogspot.com). A kota Cangue, tuapandula imue vali onjanja.


"Etu tucinyi casuapo, kuenda twayonguile okunina oco vofeka yetu olosoma viutundasonde kavikapilikiwe okupopia oputu, yina kavatela ciwa olonjanja vialua, osimbu okuti nda pali oloñuatisi vitela elimi lioputu".
...
Viakuavo tuimba uvangi vievi
Artoliterama (http://www.artiliterama.blogspot.com/)
Mesu ma Jikuka (http://www.mesumajikuka.blogspot.com/)
Inside Out (http://www.afrikabluesky.blogspot.com/)
Uige Centrico (http://www.uigecentrico.blogspot.com/)
Universidade Jean Piaget Polo de Benguela (www.universidadepiagetbenguela.blogspot.com/)
.
Tukulavokaeli uhayele kuenda utõi
Ame kamba liene, Gociante Patissa

domingo, 14 de junho de 2009

Olusapo: "Eveke limue liasandele ukema"*

Kuakala ukuenje umue waenda lokusakalala, cokuti lotulo kakuatele. Waenda lokulipulapula ukuenje wu ndeti. “Cilingila nye okuti, ame ndicimumba cocimatamata, letosi lyukema sikuete?! Cilingila nye okuti layumue ño, vimbo, ofetika ombangulo yokuti yinditukula ame?”

Ukuenje wiya ocisokolola sui… okuiya wakuata ocisimilo cimue “culoño”. Wavanjiliya okuti, catete komunu oyongola ukema, okukuliha pi pakasi omuenyo womanu vimbo. Etambululo lieli oukuti: povava! Omo okuti, ndaño muele cina oholua, alopo yinyua ovava.

Cina muele okuti kakuacile ciwa, ukuenje walimba vonjila yokocisimo (ale onjombo). Eci apititala vali kasumile: ofetika okunia. Nie muele pomela wocisimo, eye osia po oluhaku waye. Olondona eci vyakapitila lomele oco vitape ovava, vasaña elundu lieniña. Opo muele okuimba oluiya.

Ukuenje kefetikilo wasanjukile, puãi, oku ceya okupitila, ema liolio ho. La sekulu yimbo, soma haeye tio yayi, wovanjele ovitangi. Nda tulinga tuti soma ociliangu, yu wanyola ocimumba caye? Cilingila nye okuti ukulu wendamba okulonga ovimumba kacitela?!

Ondaka tupa po yeyi okuti, vokusanda ukema ciyongola okuenda ciwa – katukasandi omangu lamania – momo ukema kuli vo uvi.
*
Olusapo woponjango kimbo lietu
Gociante Patissa

terça-feira, 31 de março de 2009

Ulandu wa Kandumbu (cosi oku seteka)


Kalungi, a vakwetu!
Twanena etali olusapo wa Kandumbu.

Eteke limwe, Kandumbu otundilila kepya, lombelela ka kwete! Onjala pwãi yovala calwa. Oku pita ndeti kosongo yimwe yokombwelo yimbo, wasaña alume vayuva ongombe. Kandumbu wacivanjiliya swi... Noke yaco wasokolola heti cavelapo oku pinga, hambi oku nyana camãle.
- Vakwetu, kalungi!
- Kuku!
- Ndipopya ocili cange - Kandumbu watongeka -, nda yongwile ño nda citava oku nyihã apwãla vo ngombe, oco ndikalitekule lavo konanyã.

Okwiya vakuavo ka vavanjele konyima, vo wavela eci a pinga. Kandumbu weya pokuti ka cikulihinle nda opandula, ale olivela:

Cina hapa ndipinge utima, nda vawunyiha. Ndatopela nye okuti ko ngome dipinga ko apwãla?!...

Okulia Kuwa!

sexta-feira, 20 de março de 2009

Ukuetu Benedito Cangeno watusonehela

«A sekulu Patissa,

Otchisimilo tch'ove tch'okusovola kamwe akanhondo k'umbundu vo' internet tchandisandjwisa tchalwa. Ovisimilo vyasoka ndevi ovyo twasukila otcho v'ofeka y'etu ndulingilemo tchimwe tchisilivila. Ove salapo tchiwa, kwenda upange wafetika ndeti wendisa k'ovaso.
Ame
Benedito Cangeno»

.............................
Etu tulinga tuti tucisanjuila omo vakuetu vaenda lokulavulula onjongole yetu yokuti elimi lietu liumbundu likuata evindi vo Internet. Nda ove okasi vongola ale sio, nda ucimbundu ale sio, kavela ño nda osole Umbundu, tusapeli.
Twapandula cimue!!!
Gociante Patissa

segunda-feira, 9 de março de 2009

Olusapo: osima vaimahisa owiki

Hela, ponambi ya cimumba wange woñaña, tuakala lokusapela. Ndomo wacikulihi ale okuti, polonambi, pakuete uloño wokutambula uloño vovilongua.

Oco yapa vokusapela, umue walombolola ekalo kaliaposokele lia ndona umue okuti olipanda calua. Posi eya osanda okulekisa okuti ovo vakuete ovikuata, olohuasi. Eci catanga mo omanu ceci okuti ndona u ndeti kayongola okutalavaia, ulume muele eye lika onalavayi, ndaeño kepata oku atundila kakuli vo uhuasi.

Sekulu umue yu watambulula hati, ndona ovanguiwa apa olinga ndolusapo wosima:

“Osima vayilisa owiki. Puãi yapa kayimuha, ikuata okulesa etimba liaye liosi, la pana okuti owiki waco kawapitilile”.

quinta-feira, 5 de março de 2009

Osãi y'akãi (Tusumbili olonjali)

Volonjila vyOngola yetu olonjali viendisa olomilu oco vitekule epata...
Onjila eyi ndeti tuyitukula tuti OHANGA, puãi koputu vati GALINHA DO MATO. Vakuetu ko Brasil vayitukula vati GALINHA DE ANGOLA. (Elitalatu lia tyasulua la kamba António Salomão Ngandu).

terça-feira, 13 de janeiro de 2009

Olusapo watete ko 2009: “ONGUE KUENDA OÑAÑA”

Kimbo kupãla, kuna okuti ofela yikamba ongusu yokulamana olomunda, kuna akuti alume valongisiwa uloño womuenyo pokusuñinya ponjango, pana akuti vovilongua ovinyama visapela, ovikunla vi sika efiengu, kuenda olondui vimba ovisungo, kuli ombala yimwe londuko Cindumbu. Yatyamela o Monte-Belo, kolupale wo’Mbokoio. Oko kutunda olusapo wetu wetaeli.

Kuakala apa ko Cindumbu umue utyañi wolohuin, una wakala locikele cokupasuka vokuca oco alimelehe ko vusenge. Koñolosi oco asiataele okutyuka.

Ulume wu ndeti wakala ocimbumba lokukuata oñaña yosiwe. Walumbile vo ongue asangele tupu okamola ulika v’usitu. Yu vakuata muele ocikembe, cikale eye, cikale ocinyama. Weya okukolela ongue oyo toke petosi lyokuyisilasila okulava oñanã osimbu eye akatyanã olohuin. Koñolosi pokutyuka, ongue yasiataele okuyolela ñala yaye ndacina olombua viasiata okulinga.

Olosungue vyutiañi violohuin eteke limue viafetika okulungula vati:
– Ovê, lunguka, ocinyama ndongue hacoko okolela. Eci cilumana, omo okuti covusenge. Eteke ño onjala yusiopota, oñaña yove iya yitakiliwa.

Utyañi kaendele lokukapako alungulo vaco, kuenda waenda lokusima ati olosungue vienda lokuluisa. Ongue ekamba lyaye, nda kacipondola okuti yipanga usuanji wanlinga ndowo. Ovo puãi vaenda lokutongeka okulungula:
– Eteke onjala yukuata, kamba lyove ngue wiya otakila oñaña!

Eteke limue, oco apa okuti utyañi utue wotokota levi ainda lokuyeva, ati ndipitila ndeti konjo, olete ongue yuyolela lesanju. Ocitangi ño ceci okuti omela wangue wasalala osonde yitalala… Utyañi opo vali kasumile, simbo kutue kuitaela asangu. Wakuata vondiaviti yaye, yeyi vutue wangue, alopo yimue yeyi, toke ocinyama catula omwenyo. Okuiya iñila ndeti kohondo, wasaña oñaña yapekela, kuenda yonla muele ndusongui. Ponele yohama patandavala ekongo limue lyonyoha yatula omuenyo. Utyañi weya okulivela leci apanga, kuti puãi ongue yateyuila oñanã yañala yaye konyoha, oco yakuatela osonde komela. Ulume leci apanga vali kacilete. Weya okukenda ongue kumosi londiaviti.

Ondaka yokupatekela: sumbila alungulo otambula, puãi sokolola apa handi puapangele cimue, kuenda cavelapo, sokolola okuti kulivela wakaele ukulu nda akusiala konyima.

(Muele yolusapo lame vo sokulihile, puãi tueya lawo oco tusokololi)
Gociante Patissa, Benguela 12-01-09